Tropa hin militar, nagkakampo ha mga barangay ha Can-avid

Sitenta nga elemento hin 14th Infantry Battalion Philippine Army ha yana pabilin nga nagkakampo ha magkadurudilain nga barangay ha Can-avid tikang hadton ika-31 han Enero. Ha ilarum ni commanding officer Lt. Col. Manuel Leo Gador, ginhaharass an mga residente pinaagi hin pulong nga magkaka-ada hin unom ka-bulan tubtob usa ka-tuig nga sustenido nga military ngan psychological operations ha ira mga komunidad. Dugang pa hini, nagkokondukta hin gintatawag nga census an militar nga nagreresulta ha limitado nga paggios han mga molupyo lain la ha pag-aro hin mga identification cards ngan pag-implementar hin curfew ha tulo nga barangay partikular ha Brgy. Boco, Brgy. Pandol, ngan Brgy. Ilay.

Pabilin nga nagkakampo ha mga barangay hall, ngan pipira nga balay hin mga parag-uma ha mga sentro han kada komunidad. hadton Disyembre han nakalabay nga tuig, duha nga parag-uma nga miyembro han Asosasyon han Kablas nga Parag-uma ha Can-avid (AKP ha Can-avid) an iligal nga gindakop han mga elemento han militar samtang nagdadara hin bugas tipauli ha ira mga balay. Lain la hini nga panhitabo, usa gihap nga miyembro han organisasyon an iligal nga gindakop ngan ginkasuhan hin mga ginhimo-himo nga kaso.

Samtang, ha usa nga online post, ginpanawagan han Samahan han Gudti nga Parag-uma ha Sinirangan Bisayas (SAGUPA-SB) nga ig-undang na han 14th IBPA an mga operasyon militar ha Can-avid, igrespetar an Comprehensive Agreement on Respect for Human Rights and International Humanitarian Law (CARHIHL), ngan ig-undang na an panhadlok ngan panarhog ha mga parag-uma.

Please follow and like us:
0

Eastern Vista

Eastern Vista is an alternative media organization in Eastern Visayas. Stories of people in the struggle for justice and aid after super typhoon Yolanda inspired its creation in 2014. Eastern Vista is also a co-producer of Lingganay han Kamatuoran, a Waray-based radio magazine program airing since 2003. From Eastern Philippines, Eastern Vista shares the news and views from a people rising.

Leave a Reply

Your email address will not be published. Required fields are marked *