Pagpaumento ha sweldo han mga magturutdo, iginpanawagan durante han World Teachers Day celebration

Lingganay BalitaSamtang suspendido an mga klase ha kadam-an nga mga elementary ngan secondary schools ha Sinirangan Bisayas, utro naman nga iginpanawagan han Alliance of Concerned Teachers – Eastern Visayas an maiha na gin-aaro nga pagpaumento han sweldo han mga magturutdo.

Ha pahayag ni ACT Eastern Visayas spokesperson ngan public school teacher-leader Jonathan Urmeneta, lakip an mga magturutdo ha public schools ha mga propesyunal nga guti nala an nahi-ti-takehoom nga sweldo tungod pala han mga kabaraydan ha buhis.

Pero iba naman an nagin pahayag ni Department of Education o DepEd Secretary Leonor Briones han nagsiring ini nga sadang na an yana nga sweldo han mga teachers ngan di na daw angay dugngan an mga allowances han mga magturutdo.

Mahibabaruan tikang ha datos han DepEd nga an entry-level nga teacher in nakakakarawat hin porlomenos baynte-kwatro-mil-tres-cientos-nobenta-y-nuybe (24,399.00) pesos kada bulan nga lakip an ira basic pay, Personal Economic Relief Allowance ngan personal benefit contributions ha GSIS, Philhealth, PAG-IBIG ngan damo pa.

Pero ha pag-aram han ACT, haranis deci-sais-mil (16,000.00) pesos o mas guti pa an nakakarawat han mga magturutdo, waray pa hini an mga loans kun diin kasagaran nabibiktima an mga teachers han loan sharks.

Yana naman nga World Teachers Day, naghihingyap an Alliance of Concerned Teachers nga babatunon han gobyerno an ira panawagan nga umento kun diin ginduduso yana han ACT Teachers Partylist ha Konggreso an House Bill 56. Gin-uunod han HB 56 an baynte-singko-mil (25,000.00) pesos nga pasweldo ha entry-level teachers samtang deci-sais-mil (16,000.00) naman nga minimum ha non-teaching nga empleyado han DepEd.

Please follow and like us:
0

Eastern Vista

Eastern Vista is an alternative media organization in Eastern Visayas. Stories of people in the struggle for justice and aid after super typhoon Yolanda inspired its creation in 2014. Eastern Vista is also a co-producer of Lingganay han Kamatuoran, a Waray-based radio magazine program airing since 2003. From Eastern Philippines, Eastern Vista shares the news and views from a people rising.