Makabayan Bloc, iginpasa an HB 7415 para ipagbawal an ‘endo’ ha gobyerno

Opisyal na nga iginpasa ha House of Representatives han Makabayan Bloc an House Bill 7415 o kun Security of Tenure for Non-Regular Employees in Government Act of 2018 nga nagsisiring nga dapat ipagbawal na an tanan nga porma hin kontraktwalisasyon ha sakob han gobyerno. Dugang pa hini, sumala ha Makabayan Bloc, angay la nga tagan na hin security of tenure ngan civil service eligibility an tanan nga mga empleyado han gobyerno nga diri regular kun sobra na ha 6 ka bulan an ira pagtrabaho. Ginlalangkob hini nga House Bill an mga opisina han mga national agencies, local government units (LGU), state universities and colleges (SUCs), government-owned and controlled corporations (GOCCs), ngan tanan pa nga mga opisina han gobyerno.

Sumala kan ACT Partylist Rep. Antonio Tinio, an gobyerno an pinakadako nga promotor han endo tungod nga umabot na ha 721, 282 na nga mga trabahador ngan empleyado an nagtatrabaho komo parte han Contract of Service (COS) ngan Job Order (JO). Dugang pa ni Tinio, kadam-an hini nga mga kontraktwal nga trabahador ngan empleyado in nagtatrabaho ha sakob han Department of Social Welfare and Development (DSWD), ngan ha Department of Education (DepEd).

Ginhihingita gihap han mga magbaralaud ilarum han Makabayan Bloc nga igbasura na an Joint Circular 1, s.2017 nga iginpagawas han Department of Budget and Management (DBM), Civil Service Commission (CSC), ngan Commission on Audit (COA) nga naghahatag hin katugutan ha mga ahensya han gobyerno nga magkuha hin mga mananrabaho nga JO ngan COS.

Samtang, gin-anunsyo naman han Makabayan Bloc an ira iglalansar nga gios protesta kontra ha circular joint han DBM, CSC, ngan COA, ngan ha kontraktwalisasyon ha ika-27 han Marso kaupod an mga magturutdo ha mga pampubliko nga eskwelahan, health workers, ngan tanan nga sibilyan nga trabahador ha bug-os nga nasud.

Please follow and like us:
0

Eastern Vista

Eastern Vista is an alternative media organization in Eastern Visayas. Stories of people in the struggle for justice and aid after super typhoon Yolanda inspired its creation in 2014. Eastern Vista is also a co-producer of Lingganay han Kamatuoran, a Waray-based radio magazine program airing since 2003. From Eastern Philippines, Eastern Vista shares the news and views from a people rising.

Leave a Reply

Your email address will not be published. Required fields are marked *