Kilusang Mayo Uno, nagprotesta ha atubangan han DOJ

Naglansar hin usa nga gios protesta an militante nga grupo nga Kilusang Mayo Uno (KMU) ha atubangan han opisina han Department of Justice (DOJ) hadton ika-22 han Marso para ipanawagan nga pagawsun na an usa nga miyembro nira nga hi Marklen Maojo Maga nga gin-aresto hadton ika-22 han Pebrero.

Ginkundena gihap han grupo an ginhihimo han administrasyon Duterte nga pagpapagawas ha mga self-confessed drug lord ngan mga personalidad nga ginaakusaran hin koraapsyon samtang ginpipriso naman an mga lider ngan organisador sugad  kan PISTON National President George San Mateo nga mayda gihap ginkaka-atubang nga mga kaso.

Iligal nga gindakop hi Maga hin mga element han PNP Criminal Investigation and Detection Group (CIDG) tungod ha mga ginhimo-himo nga kaso hin pagpatay ha Agusan del Norte ngan illegal possession of firearms and ammunition.

Sumala kan KMU Secretary General Jerome Adonis, imposible nga magin kriminal hi Maga tungod nga usa hiya nga organisador. Dugang pa ni Adonis, katapos pala ni Maga magdul-ong ha iya anak ngan nakigmulay pa hin basketball ha iya mga sangkay han madakop hiya han mga element han PNP.

Ginkundena gihap han grupo an crackdown kontra ha mga aktibista, organisador ha ilarum han administrasyon Duterte. Tungod hini, dugang ni Adonis, ginpreso hi Maga ngan an iba pa nga mga progresibo nga indibidwal nga may kapas maghatag hin pagsuson ha presente nga administrasyon.

Gin-aghat naman ni Adonis hi Presidente Duterte nga imbis nga tarhugon an iya mga kritiko, dapat niya pamatian an mga panawagan han kada organisasyon nga may-ada lehitimo nga mga panawagan sugad han PISTON ngan KMU.

Please follow and like us:
0

Eastern Vista

Eastern Vista is an alternative media organization in Eastern Visayas. Stories of people in the struggle for justice and aid after super typhoon Yolanda inspired its creation in 2014. Eastern Vista is also a co-producer of Lingganay han Kamatuoran, a Waray-based radio magazine program airing since 2003. From Eastern Philippines, Eastern Vista shares the news and views from a people rising.

Leave a Reply

Your email address will not be published. Required fields are marked *